Ki tō mōhio ka taea te mahi hiko ahakoa kāore he pēteri, he pūhiko hiko rānei? Ka taea te mahi hiko iti mā te rēmana. Hei mahi pēteri rēmana me te rongo i te rere a te “hikowai”, whaia mai ngā tohutohu o raro ake nei.

Hei mahi

1. Mā te pakeke te 2 īnihi o te pareārai e tango mai i te waea konukura. Puritia te waea ki ngā kaipuri.
    
2. Whakatikatia te puripepa ka tapahi ai kia 2 īnihi o te waea rino kua matatikahia, whakamahia rānei te ngaku konutea, te wāhi 2 īnihi rānei.
    
3. Whakamahia te hōanga hei whakamāene i ngā wāhanga matanui o ngā moka o te waea, te puripepa, te wāhi konutea rānei.
    
4. Āta whakakōraputia te rēmana ki ō ringa. Kia kaua te kiri e whawhati. He pai te āta whakapīrori ki te tēpu.
    
5. Pēhia ngā wāhi o te puripepa me te waea ki roto i te rēmana kia pātata tonu, ēngari kia kaua e pā.
    
6. Whakamākūtia tō arero ki te huare. Whakapākia atu tō arero ki ngā moka o ngā waea e rua.

Ō kitenga

Ko te pēteri rēmana te pēteri ngaohiko, ko tāna he takahuri i te pūngao matū hei pūngao hiko.

Kei roto ngā mētara e rua i te pēteri (te puripepa mētara me te waea konukura). Koinei ngā mokahiko, ngā wāhanga o te pēteri ki reira ka tomo, ka puta te iahiko i te pēteri. Kei roto ngā mokahiko i tētahi wai kei roto ko te waihiko, arā he wairewa e taea ana te kawe hiko.

I roto i te wairewa o te wai me te electrolyte, pērā ki te waikawa o te rēmana, ka kohi te nui o ngā electrons ki tētahi moka o ngā mokahiko. Ā, i tērā wā hoki e ngaro ana ngā irahiko i tērā atu mokahiko.

Ki te pā tō arero ki ngā mokahiko ka katia te ara iahiko, ka tukua te terenga o te hiko. Ko tā te rēmana kotahi he 7/10 o te wae ngaohiko hiko. Ki te honoa ngā rēmana e rua, ka taea te whakahiko i tētahi wati mamati utu iti (ka 1.5 wae ngaohiko). (Whakamahia te waea tūwai roa, me te ngāwari hei hono i te waea hiriwā o tētahi rēmana ki te waea konukura o tētahi rēmana. Kātahi ka tāpiritia ētahi waea tūwai mai i ērā atu waea e rua o roto i te rēmana ki te hononga o te pouaho tōrunga, me te tōraro o te pēteri ka hiko ai.)

Ko te rongo i te tengatenga me te mētara ki tō arero nā te nekenga o ngā irahiko mā te huare o runga o tō arero.

Tuhipoka Mō Te Pūngao Rēmana

Nā ētahi akonga tēnei mahi ā, ka ngana ai rātou ki te whakamahi “pēteri” rēmana hei whakakā i te rama raiti o tētahi ramaringa. Kāore i ea. He aha ai? He iti noa iho te rerenga ka puta i te rēmana (ko te kotahi miriapi). He korekore rawa hei whakakā i te rama. Ahakoa te nui o ngā rēmana, kāore e nui te rerenga mā te waea. Ahakoa he tika te nui o te ngaohiko (ka 1.5 wae ngaohiko mai i ngā rēmana e rua), he ngoikore rawa te rerenga. Ēngari he whakamātauranga rawe tonu! Ahakoa te kore o te tatū tika o te whakamātauranga, he āwhina tonu i a tātou kia mārama ki ngā mahinga.